- अतिक्रमणे तात्काळ निष्कासित करण्याचे आयुक्तांचे निर्देश
- पदपथावर असलेल्या प्रचारशेडकडे मात्र महापालिकेचे दुर्लक्ष
महागिरी कोळीवाडा आणि दादोजी कोंडदेव स्टेडीयम परिसरातील सर्व पदपथांवर नगरसेवकांनी आपले प्रचार शेड उभारले आहेत. वाचककट्टा, विश्रांती कट्टाच्या नावाखाली या परिसरातील एकही पदपथ मोकळा राहिलेला नाही. इतकेच नव्हे तर चक्क वाहतुकीसाठी असलेल्या रोडवर देखील नगरसेवकांनी कट्ट्याचे बांधकाम सुरु केल्याचे दिसून येत आहे. मात्र याकडे महापालिका जाणिवपूर्वक दुर्लक्ष करीत आहे. यामधील काही शेडचे बांधकाम महापालिकेतील नगरसेवकांचा कालावधी संपल्यानंतर सुरु झाले आहे. जे आजही सुरू आहे. मात्र याकडे ठाणे महानगर पालिका दुर्लक्ष करीत असल्याने परिसरातील नागरिकांना चालणे मुश्कील झाले आहे. सिडको ते कळवा नाका पर्यंतचा विशेष करून स्टेडियमच्या लगत असलेला सर्व पदपथ या प्रचारशेडनी व्यापला आहे. नगरसेवकांनी वाचककट्टाच्या नावावर स्वत:च्या प्रचाराकरिता हे शेड बांधले असल्याचा आरोप येथील सामाजिक संघटना करीत आहेत. मात्र याबाबत पालिका जाणिवपूर्वक दुर्लक्ष करीत आहे.
शहरातील रस्ते, दुभाजक तसेच चौकात अनधिकृतपणे जाहिरात फलक, बोर्ड, बॅनर्स, स्टिकर तसेच भिंतीपत्रके लावून शहर विद्रुप करणाऱ्या व्यक्ती अथवा संस्थेविरुद्ध महाराष्ट्र मालमत्ता विद्रुपीकरण कायदा- १९९५' अंतर्गत तात्काळ कारवाई करून फौजदारी गुन्हे दाखल करण्याचे आदेश महापालिका आयुक्त डॉ. विपिन शर्मा यांनी सर्व सहाय्यक आयुक्तांना दिले आहेत. परंतु इथे सर्व पदपथ वाचककट्टाच्या नावावर आपल्या प्रचाराचे केंद्र बनवणाऱ्यांवर महापालिका आयुक्त कारवाई करणार आहेत की नाही असा सवाल येथील नागरिक विचारत आहेत.
0 टिप्पण्या