50 खोके, माजलेत बोके च्या होर्डींग्जने ठाणेकर हैराण

  जनरल अरुणकुमार वैद्य मार्ग कचराळी तलाव येथील महापालिका भवन जवळील सर्कल येथील सिद्धीविनायक मंदिर प्रवेशद्वार येथे 6 बाय 8 फूट मोजमापाचा  होर्डिंग लावून त्यावर 'खाऊन खाऊन 50 खोके, माजलेत बोके, माजलेत बोके' असा आक्षेपार्ह मजकूर लिहलेला व त्याच्या शेजारीच 8 बाय 8 फूट मोजमापाच्या होर्डिंगवर' भूखंडाचे श्रीखंड ठाणेकरांना वाटणार का?' असा मजकूर लिहीलेला होता.  हे होर्डीग्ज ठाणेकरांमध्ये चर्चेचा विषय बनले होते. अगदी कमी वेळात या होर्डीग्जची चर्चा संपूर्ण ठाण्यात रंगली होती. ५० खोके माजलेत बोके ही टॅगलाईन सध्या ठाणे शहरात रंगली आहे. सदर चर्चेचा विषय ठऱलेली  होर्डिग्ज हे महापालिकेच्या  अतिक्रमण विभागाच्यावतीने ताब्यात घेतले  असून अज्ञात इसमां विरुद्ध नौपाडा पोलीस ठाण्यात रितसर तक्रार दाखल करण्यात आली आहे.

 शहरात बेकायदेशीरपणे  होर्डिंग्ज लावून शहर विद्रुप करणाऱ्यांवर ठाणे महापालिकेच्यावतीने होर्डिंग्ज हटविण्याची कारवाई करण्याचे आदेश महापालिका आयुक्त अभिजीत बांगर यांनी दिले आहे. त्यानुसार ठाणे महापालिका भवन समोरील कचराळी तलाव सर्कल येथे बेकायदेशीरपणे लावण्यात आलेल्या होर्डिंग्जवर महापालिकेच्यावतीने कारवाई करण्यात आली. सदर होर्डिंग्जमुळे सामाजिक तेढ निर्माण होण्याची शक्यता वर्तवली जात होती. यामुळे ठामपाच्या वतीने हे  होर्डिंग्ज तात्काळ हटविण्यात आले. सदरची कारवाई अतिक्रमण नियंत्रण व निष्कासन विभागाचे उपायुक्त जी.जी. गोदेपुरे यांच्या मार्गदर्शनाखाली (सहाय्यक आयुक्त सनियंत्रण व समन्वय) महेश आहेर यांनी अतिक्रमण विभागाच्या  कर्मचा-यांसमवेत केली. यापुढेही  महापालिकेच्यावतीने अनधिकृत  होर्डिंग्जवरील कारवाई सुरूच राहणार असल्याचे आयुक्तांनी यावेळी नमूद केले. याबाबत महेश आहेर (सहाय्यक आयुक्त सनियंत्रण व समन्वय) यांनी स्वत:  अज्ञातांविरुद्ध नौपाडा पोलीस ठाण्यात तक्रार देखील दाखल केली आहे.