"धारावी पुनर्विकास प्रकल्प प्रायव्हेट लिमिटेड" (DRPPL) ही धारावीचा पुनर्विकासाकरिता स्थापन झालेली कंपनी आता "नवभारत मेगा डेव्हलपर्स प्रायव्हेट लिमिटेड" (NMDPL) म्हणून ओळखली जाणार आहे. हा बदल 17 डिसेंबर 2024 पासून करण्यात आला आहे. "धारावी पुनर्विकास प्रकल्प प्रायव्हेट लिमिटेड," कंपनीच्या मूलभूत ध्येयाचे प्रतिबिंब असताना, महाराष्ट्र सरकारचे विशेष नियोजन प्राधिकरण आणि धारावी पुनर्विकास प्रकल्पाशी संबंधित विभाग, म्हणजेच DRP हे संक्षिप्त रूप असल्याने वारंवार गैरसमज झाले आहेत! शिवाय, धारावी येथे सर्वात मोठा झोपडपट्टी पुनर्वसन प्रकल्प यशस्वीपणे राबवून, झोपडपट्टीमुक्त होण्याचे भारताचे महत्त्वाकांक्षी लक्ष्य आहे. अशा प्रकारे हे नाव अशा आकांक्षा पूर्ण करू शकणाऱ्या राष्ट्राच्या उद्योगाची निर्मिती दर्शवू शकते. कंपनीच्या नावात बदल म्हणजे बदल आणि परिवर्तनाची भावना. असे स्पष्टीकरण कंपनीकडून देण्यात आले आहे. कॉर्पोरेट कम्युनिकेशन, एचआर, आयटी आणि इतर विभागातील टीम्सने जिथे लागू असेल तिथे आधीचे नाव आणि संक्षेप बदलण्यासाठी तत्काळ पावले उचलावीत, उदा. लेटरहेड, कागदपत्रे, वेबसाइट आणि इतर अशा अधिकृत प्लॅटफॉर्मवर, नवीन नाव प्रतिबिंबित करण्यासाठी त्वरित सुधारणा करावी असे आदेशही देण्यात आले आहेत.
अदानि समुहाला धारावीचा पुनर्विकास करण्याचा ठेका देण्यात आला आहे की, संपूर्ण भारताची जमिन ताब्यात देण्यात येणार आहे असा सवाल आता धारावीकर विचारत आहेत. केवळ धारावीच्या एकूण जमिनीपेक्षा कैक पटीने मुंबईतील जमिन अदानि समुहाला देण्यात आली आहे. मग नवभारत ऐवजी नवमुंबई का नाही, नवभारतच का? असा प्रश्नही धारावीकर विचारत आहेत. अदानी समूहाला मुंबई उच्च न्यायालयाकडून नुकताच मोठा दिलासा मिळाला आहे. मुंबईतील धारावी झोपडपट्टी पुनर्विकास प्रकल्प अदानी प्रॉपर्टीज प्रायव्हेट लिमिटेडला देण्याच्या निर्णयाविरोधात दाखल करण्यात आलेली याचिका मुख्य न्यायमूर्ती डीके उपाध्याय आणि न्यायमूर्ती अमित बोरकर यांच्या खंडपीठाने शुक्रवारी फेटाळली. अदानी समूहाला निविदा देण्याचा राज्य सरकारचा निर्णय हा मनमानी नाही, त्यात अन्यायकारक किंवा विकृत काहीही नाही, असे म्हणत ही याचिका फेटाळ्यात आली. त्याला काही दिवस उलटत असतानाच धारावी प्रकल्पाचे नामांतर होत आहे
0 टिप्पण्या